सात दिन भित्रमा स्थानीय तहबाटै मालपोत र नापी सेवा सुरु गर्ने तयारी

काठमाडौं, वैशाख १० ,भूमि व्यवस्था, सहकारी तथा गरिबी निवारण मन्त्रालय ले अब भूमि प्रशासनसम्बन्धी सेवा स्थानीय तहबाटै सञ्चालन गर्ने तयारी अघि बढाएको छ। यसका लागि मन्त्रालयले इच्छुक स्थानीय तहहरूलाई ७ दिनभित्र आवेदन दिन सार्वजनिक आह्वान गरेको छ।

हालसम्म मालपोत कार्यालय र नापी कार्यालयबाट प्रदान हुँदै आएका सेवा क्रमशः स्थानीय तहमा हस्तान्तरण गर्ने लक्ष्य राखिएको मन्त्रालयले जनाएको छ। यसले सेवा प्रवाहलाई छिटो, सहज र नागरिकमैत्री बनाउने अपेक्षा गरिएको छ।

सूचना अनुसार, सेवा सञ्चालन गर्न इच्छुक स्थानीय तहहरूले आवश्यक जनशक्ति, पूर्वाधार र व्यवस्थापनको प्रतिबद्धता सहित आवेदन दिनुपर्नेछ। आवेदन सूचना प्रकाशित मितिले ७ दिनभित्र सम्बन्धित विवरणसहित स्क्यान गरी इमेलमार्फत पठाउनुपर्नेछ।

मन्त्रालयले आवेदन पठाउनका लागि निम्न इमेल ठेगाना उपलब्ध गराएको छ:info@molcpa.gov.np,info@dolma.gov.np,jaggaprsasan@gmail.com,

यो कदमले संघीय संरचनालाई थप सुदृढ बनाउँदै स्थानीय सरकारलाई अधिकार हस्तान्तरण गर्ने प्रक्रियालाई प्रभावकारी बनाउने विश्वास लिइएको छ।