प्रहरीका आठै एआईजीको एकसाथ सरुवा, सीआईबीमा चतुर्वेदी र उपत्यकामा राठौर

काठमाडौं, असार १८। सरकारले नेपाल प्रहरीका जनपदतर्फ कार्यरत सबै आठ जना अतिरिक्त महानिरीक्षक (एआईजी) को एकैपटक सरुवा गरेको छ। बिहीबार बसेको मन्त्रिपरिषद् बैठकले प्रहरी संगठनमा नेतृत्व पुनर्संरचना गर्ने उद्देश्यसहित व्यापक सरुवाको निर्णय गरेको हो।

सरुवाअनुसार प्रहरीको केन्द्रीय अनुसन्धान ब्युरो (सीआईबी) का प्रमुख मनोज केसीलाई अन्यत्र जिम्मेवारी दिइएको छ भने उनको स्थानमा उमाप्रसाद चतुर्वेदीलाई सीआईबीको नेतृत्व सुम्पिएको छ।

त्यसैगरी, उपत्यका प्रहरी कार्यालय रानीपोखरीका प्रमुख ईश्वर कार्कीलाई मानवस्रोत विकास विभागमा सरुवा गरिएको छ। कार्कीको स्थानमा यसअघि अपराध अनुसन्धान विभागमा कार्यरत सुशील सिंह राठौरलाई उपत्यका प्रहरी प्रमुखको जिम्मेवारी दिइएको छ।

राठौरको स्थानमा अपराध अनुसन्धान विभागको नेतृत्व मनोज केसीले सम्हाल्ने भएका छन्। यस्तै, मानवस्रोत विकास विभागका एआईजी राजन अधिकारीलाई राष्ट्रिय प्रहरी प्रशिक्षण प्रतिष्ठानमा पठाइएको छ भने प्रतिष्ठानमा कार्यरत सिद्धिविक्रम शाहलाई कार्य विभागमा सरुवा गरिएको छ।

यसैबीच, प्रदेश समन्वय विभागमा कार्यरत एआईजी डम्बर विकलाई प्रशासन विभागको जिम्मेवारी दिइएको छ।

सरकारको यो निर्णयलाई नेपाल प्रहरीको उच्च नेतृत्व तहमा गरिएको महत्वपूर्ण प्रशासनिक पुनर्संरचनाका रूपमा हेरिएको छ। नयाँ जिम्मेवारीसँगै सम्बन्धित विभागहरूमा कार्यसम्पादनलाई थप प्रभावकारी बनाउने अपेक्षा गरिएको छ।