साउदी अरबले ऊँटलाई पासपोर्ट किन दियो?

साउदी अरब ,माघ  २७ ,साउदी अरबमा ऊँट केवल जनावर मात्र होइन, संस्कृति, पहिचान र अर्थतन्त्रको महत्वपूर्ण आधार हो । यही कारण सरकारले देशभर रहेका लाखौँ ऊँटलाई पासपोर्ट जारी गर्ने निर्णय गरेको छ ।

यस कार्यक्रममार्फत प्रत्येक ऊँटको पहिचान, मालिकको विवरण, स्वास्थ्य अवस्था र स्थानको अभिलेख राखिनेछ । यसले ऊँटको अवैध कारोबार रोक्न, हेरचाह सुधार गर्न र आधुनिक व्यवस्थापन प्रणाली विकास गर्न सहयोग पुग्ने अधिकारीहरूको भनाइ छ ।

सरकारी तथ्यांकअनुसार सन् २०२४ मा साउदी अरबमा करिब २२ लाख ऊँट रहेका छन्, जसले हरेक वर्ष देशको अर्थतन्त्रमा दुई अर्ब रियालभन्दा बढी योगदान पुर्‍याउँछन् । यही आर्थिक र सांस्कृतिक महत्वलाई ध्यानमा राख्दै ऊँटलाई छुट्टै हरियो पासपोर्ट प्रदान गरिएको हो, जसमा साउदीको ‘कोट अफ आर्म्स’ र ऊँटको चित्र अंकित छ ।

विश्वभर करिब ३.५ करोड ऊँट रहेको अनुमान छ । तीमध्ये सबैभन्दा धेरै सोमालियामा छन् भने त्यसपछि सुडान, मौरिटानिया, साउदी अरब र यमन पर्छन् ।

साउदी अरबमा ऊँटको सौन्दर्य प्रतियोगिता, शो र परम्परागत उत्सवहरू आयोजना हुने गर्छन् । राष्ट्रिय दिवस तथा विशेष समारोहमा ऊँटबिनाको प्रदर्शनी अधुरो मानिन्छ 

यसरी, ऊँटलाई पासपोर्ट दिनु केवल प्रशासनिक निर्णय होइन, साउदी संस्कृतिको संरक्षण र आधुनिक व्यवस्थापनतर्फको नयाँ कदम हो ।