मुस्ताङ फागुन ८, प्रधानमन्त्री सुशीला कार्की ले मुस्ताङस्थित पवित्र मुक्तिनाथ मन्दिर मा पूजा–अर्चना गर्दै धार्मिक तथा प्रशासनिक दुवै सन्देश दिएकी छन्। वारागुङ मुक्तिक्षेत्र–१ मा अवस्थित मन्दिरमा नेपाली सेनाको हेलिकोप्टरमार्फत पुगेकी उनले १०८ धारामा जलसेचन गरी दर्शन गरिन्।

मन्दिर परिसरमा करिब एक घण्टा बिताएकी प्रधानमन्त्रीले स्वदेशी तथा विदेशी दर्शनार्थीसँग संक्षिप्त भलाकुसारी समेत गरिन्। स्वागतका क्रममा स्थानीय जनप्रतिनिधि, प्रशासन र मुक्तिनाथ विकास समितिका पदाधिकारीहरूले मन्दिर क्षेत्रमा देखिएका समस्या र अधुरा पूर्वाधार योजनाबारे जानकारी गराएका थिए।

मुक्तिनाथ विकास समितिले चेन्जिङ रुम, १०८ धारा पुनर्निर्माण, एनएक्स भवन, आनी आवाससहित आठवटा पूर्वाधार योजना पुरातत्व विभागमा पेश भए पनि स्वीकृतिमा ढिलाइ भएको गुनासो गरेको छ। प्रधानमन्त्री कार्कीले आवश्यक प्रक्रिया अघि बढाउने विषयमा सम्बन्धित निकायसँग समन्वय गर्ने आश्वासन दिएको जनाइएको छ।

मन्दिर दर्शनपछि प्रधानमन्त्री कार्की जोमसोमस्थित इन्द्रबक्स गण पुगेर सुरक्षा अवस्था र निर्वाचन तयारीबारे छलफलमा सहभागी भइन्।

फागुन २१ गते हुने प्रतिनिधिसभा सदस्य निर्वाचनलाई स्वच्छ, निष्पक्ष र भयरहित वातावरणमा सम्पन्न गर्न उनले सुरक्षा निकायलाई निर्देशन दिइन्। “निर्वाचनलाई सफल बनाउन दत्तचित्त भएर लाग्नुहोस्, कुनै कमजोरी नहोस्,” प्रधानमन्त्रीको भनाइ उद्धृत गर्दै प्रमुख जिल्ला अधिकारीले जानकारी दिइन्।

जिल्ला प्रशासन र मुख्य निर्वाचन अधिकृतले हालसम्मको तयारी, सुरक्षा योजना तथा समन्वय अवस्थाबारे प्रधानमन्त्रीसमक्ष ब्रिफिङ गरेका थिए।

धार्मिक आस्था, विकास चासो र निर्वाचन सुरक्षालाई एउटै यात्रामा जोड्दै प्रधानमन्त्री कार्कीको मुस्ताङ भ्रमणलाई राजनीतिक तथा प्रशासनिक दृष्टिले अर्थपूर्ण रूपमा हेरिएको छ।