विराटनगर, बैशाख १२ विराटपाटी — विराटनगर मा सञ्चालनमा रहेका स्पा तथा मसाज सेन्टरहरूमाथि प्रहरीले कडाइ सुरु गरेको छ। शनिबार सञ्चालन गरिएको विशेष अपरेशनका क्रममा विभिन्न स्थानबाट ३६ जना व्यक्तिलाई नियन्त्रणमा लिइएको प्रहरीले जनाएको छ।

महानगरका वडा नं. १३, १४ र १५ भित्रका स्पाहरूमा गरिएको अनुगमनका क्रममा कतिपय संस्थाहरूले कानुनी मापदण्ड पालना नगरेको पाइएको छ। विशेषगरी किपु स्पा मा गरिएको छापामा आवश्यक अनुमति र प्रक्रिया पूरा नभएको खुलेपछि सञ्चालकसहित कर्मचारीहरूलाई नियन्त्रणमा लिइएको हो।

इलाका प्रहरी कार्यालय रानीबाट खटिएको टोलीले स्थानीय स्तरमा बढ्दै गएको गुनासोका आधारमा उक्त अभियान अघि बढाएको हो। पछिल्लो समय स्पा सेन्टरहरूमा मापदण्डविपरीत गतिविधि भइरहेको भन्ने व्यापक चर्चा चलिरहेको थियो।

प्रहरीले नियन्त्रणमा लिइएका सबै व्यक्तिमाथि सोधपुछ जारी रहेको र आवश्यक प्रमाण संकलन भइरहेको जनाएको छ। साथै, यस्ता गतिविधि रोक्न आगामी दिनमा अझ सशक्त अनुगमन तथा कारबाहीलाई निरन्तरता दिइने स्पष्ट पारेको छ।

स्थानीयवासीले भने यस्तो कदमलाई सकारात्मक रूपमा लिँदै यस्ता व्यवसायलाई नियमभित्र ल्याउन आग्रह गरेका छन्।