काठमाडौँ, असार ५ — सह-आयोजक मेक्सिको जारी विश्वकप फुटबलको नकआउट चरण (अन्तिम ३२) मा प्रवेश गर्ने पहिलो टोली बनेको छ। शुक्रबार बिहान सम्पन्न समूह ‘ए’ अन्तर्गतको खेलमा मेक्सिकोले दक्षिण कोरियालाई १–० गोलले पराजित गर्दै अघिल्लो चरणको यात्रा सुनिश्चित गरेको हो।

मेक्सिकोको जितमा दोस्रो हाफमा लुइस रोमोले गरेको एकमात्र गोल निर्णायक बन्यो। घरेलु मैदानमा हजारौँ समर्थकको उत्साहपूर्ण साथ पाएको मेक्सिकोले खेलभर प्रभावशाली प्रदर्शन गर्दै महत्वपूर्ण तीन अंक बटुल्यो।

दक्षिण कोरियाले खेलमा कडा प्रतिस्पर्धा गरे पनि प्राप्त अवसरहरूलाई गोलमा परिणत गर्न सकेन। खेलको अन्तिम समयमा केही राम्रा अवसर सिर्जना भए पनि मेक्सिकोको सशक्त रक्षापङ्क्ति पार गर्न नसक्दा कोरियाको पुनरागमन प्रयास असफल भयो।

लगातार दोस्रो जितसँगै मेक्सिकोले समूह चरणबाट नकआउट यात्रा तय गरेको छ। यस नतिजाले मेक्सिकोलाई प्रतियोगिताको बलियो दाबेदारका रूपमा समेत स्थापित गरेको विश्लेषण गरिएको छ।