ह्युस्टन । जारी फिफा विश्वकपमा नेदरल्यान्ड्सले स्वीडेनमाथि शानदार प्रदर्शन गर्दै ५–१ को फराकिलो जित निकालेको छ। कोडी गाक्पो र ब्रायन ब्रोबीले समान दुई–दुई गोल गरेपछि डच टोली नकआउट चरण नजिक पुगेको हो।

ह्युस्टन रंगशालामा शनिबार राति ६९ हजारभन्दा बढी दर्शकमाझ भएको खेलमा नेदरल्यान्ड्सले सुरुदेखि नै आक्रामक खेल प्रस्तुत गरेको थियो। पहिलो पटक सुरुआती ११ मा अवसर पाएका स्ट्राइकर ब्रायन ब्रोबीले पाँचौं र १७औं मिनेटमा गोल गर्दै टोलीलाई मजबुत अवस्थामा पुर्‍याए।

दोस्रो हाफको सुरुआतमै लिभरपुलका स्टार कोडी गाक्पोले लगातार दुई गोल थप्दै नेदरल्यान्ड्सको अग्रता अझ फराकिलो बनाए। गाक्पोले ब्रोबीको पहिलो गोलका लागि उत्कृष्ट पाससमेत उपलब्ध गराएका थिए।

खेलको ६०औं मिनेटतिर एन्थोनी एलाङ्गाले स्वीडेनका लागि एक गोल फर्काए पनि त्यसले टोलीलाई खेलमा फर्काउन सकेन। खेलको अन्त्यतिर क्रिसेन्सियो समरभिलले गोल थप्दै नेदरल्यान्ड्सको ५–१ को प्रभावशाली जित सुनिश्चित गरे।

यस जितसँगै रोनाल्ड कोम्यानको नेतृत्वमा रहेको नेदरल्यान्ड्सले दुई खेलबाट ४ अंक जोड्दै समूह ‘एफ’ को शीर्ष स्थानमा उक्लिएको छ। स्वीडेनको ३ अंक रहेको छ भने जापानको १ र ट्युनिसियाको कुनै अंक छैन।

पराजित भए पनि स्वीडेनले केही उत्कृष्ट अवसर सिर्जना गरेको थियो। तर, कमजोर फिनिसिङ र डच गोलकिपरको उत्कृष्ट प्रदर्शनका कारण उनीहरू गोल थप्न असफल भए।