अर्थशास्त्रको नोबेल हल र उडफोर्डलाई

मुद्रास्फीति, उत्पादन र उपभोगको उतारचढाव बुझ्ने अनुसन्धानका लागि सम्मान

काठमाडौँ । अर्थशास्त्रतर्फको नोबेल पुरस्कार अमेरिकी अर्थशास्त्री रोबर्ट हल र माइकल उडफोर्डलाई प्रदान गरिने घोषणा गरिएको छ। आर्थिक चक्रको विश्लेषण र स्थायित्व नीतिको प्रभाव बुझ्न सहयोग पुर्‍याउने अनुसन्धानका लागि उनीहरूलाई छनोट गरिएको खबरहबले जनाएको छ।

उनीहरूको अनुसन्धानले परिवार तथा कम्पनीका आर्थिक निर्णय, मुद्रास्फीति, उत्पादन र उपभोगबीचको सम्बन्धलाई सूक्ष्म अर्थशास्त्रीय सिद्धान्तका आधारमा व्याख्या गर्छ। यसले सरकार र केन्द्रीय बैंकलाई प्रभावकारी आर्थिक नीति निर्माण गर्न सैद्धान्तिक आधार प्रदान गरेको बताइएको छ।

आर्थिक नीतिबारे स्पष्ट सूचना प्रवाह गर्दा सर्वसाधारण र व्यवसायीको भविष्यप्रतिको अपेक्षा प्रभावित हुने भएकाले त्यसले अर्थतन्त्रको दिशा बदल्न सक्ने अनुसन्धानको निष्कर्ष छ। ऊर्जा सङ्कट तथा उपभोगमा आउने आकस्मिक परिवर्तनजस्ता आर्थिक चुनौती व्यवस्थापनमा पनि यसको उपयोगिता रहने जनाइएको छ।

रोयल स्विडिस एकेडेमी अफ साइन्सेसले सोमबार विजेताको नाम घोषणा गरेको समाचारमा उल्लेख छ। पुरस्कारको राशि करिब १२ लाख अमेरिकी डलर रहेको बताइएको छ। यसको औपचारिक नाम ‘अल्फ्रेड नोबेलको स्मृतिमा दिइने स्वेरिजेस रिक्सबैंक अर्थशास्त्र पुरस्कार’ हो।