प्रदेश अधिकार सुनिश्चित गर्न विराटनगरमा मुख्यमन्त्री सम्मेलन

विराटनगर, २७ असोज। प्रदेशका अधिकार सुनिश्चित गर्दै संघीयता कार्यान्वयनलाई प्रभावकारी बनाउने उद्देश्यले विराटनगरमा मुख्यमन्त्री सम्मेलन सुरु भएको छ।

कोशी प्रदेश सरकारको आयोजनामा भएको सम्मेलनमा छ प्रदेशका मुख्यमन्त्री सहभागी छन्। सुदूरपश्चिमका मुख्यमन्त्री खगराज भट्ट भने बजेट विवादका कारण उपस्थित भएका छैनन्।

सम्मेलनमा प्रदेशको अधिकार, वित्तीय स्रोतको बाँडफाँट, कानुनी जटिलता र प्रदेशहरूबीच समन्वयका विषयमा छलफल हुनेछ।

दुई दिनसम्म चल्ने सम्मेलनले प्रदेशका साझा माग र प्रतिबद्धता समेटिएको ‘विराटनगर घोषणापत्र’ जारी गर्नेछ। घोषणापत्रमार्फत संघीय सरकारसँग प्रदेशका अधिकार सुनिश्चित गर्न सामूहिक पहल गरिनेछ।