स्वास्थ्य तथा जनसंख्या मन्त्रालयले सरकारी स्वास्थ्य संस्थाहरूमा एकीकृत विद्युतीय प्रणाली सञ्चालन गर्ने योजना बनाएको छ, जसले एउटै स्वास्थ्य परीक्षण दोहोरिन नदिन मद्दत गर्नेछ।

स्वास्थ्य मन्त्री प्रदीप पौडेलले अस्पतालमा गरिएको बिरामीको स्वास्थ्य परीक्षण सम्बन्धी जानकारी अर्को स्वास्थ्य संस्थासँग साझा गर्न सके अनावश्यक बोझ हट्ने, परीक्षणको समय घट्ने र खर्च कम हुने निर्णय गरेका छन्।

मन्त्री पौडेलद्वारा अनुमोदित विद्युतीय चिकित्सा अभिलेख प्रणाली सञ्चालन तथा व्यवस्थापन निर्देशिका, २०८१ ले बिरामीका परीक्षण दोहोरिन नदिने, समय तथा खर्च बचत गर्ने लक्ष्य राखेको छ। यसले नीति निर्माणका लागि एकीकृत स्वास्थ्य डेटा संकलन गर्न मद्दत गर्नेछ।

स्वास्थ्य मन्त्रालयका अनुसार यो एकीकृत विद्युतीय प्रणाली मन्त्रालयकै नियन्त्रणमा रहनेछ। सरकारी तथा निजी दुवै स्वास्थ्य संस्थाहरूले बिरामीको स्वास्थ्य डेटा विद्युतीय चिकित्सा अभिलेख प्रणालीमा राख्नुपर्नेछ, जसले आवश्यक परेमा जानकारी साझा गर्न सहज बनाउनेछ।

स्वास्थ्य मन्त्रालयका प्रवक्ता डा. प्रकाश बुढाथोकीका अनुसार यो प्रणालीले बिरामीहरूलाई कागजात बोकेर हिँड्नुपर्ने झन्झट हटाउनेछ र अस्पतालहरूले डेटा व्यवस्थापन गर्न सजिलो बनाउनेछ।

“नेपालका अस्पतालहरूले विद्युतीय प्रणाली त अपनाइसकेका छन्, तर हालको डेटा आपसमा साझा गर्न मिल्दैन। जसले गर्दा बिरामीहरू विभिन्न अस्पतालमा सोही परीक्षण दोहोर्याउन बाध्य छन्। नयाँ प्रणाली लागू भएपछि यस्तो समस्या पूर्ण रूपमा समाधान हुनेछ,” उनले बताए।

निर्देशिकाले अस्पतालहरूलाई बिरामीको स्वास्थ्य समस्या अनुसार गरिएका परीक्षण, चिकित्सकको सल्लाह, प्रयोगशाला तथा रेडियोलोजी रिपोर्ट, सेवा लिने बिरामी र उनका आफन्तको विवरण, रक्त बैंकसम्बन्धी जानकारी आदि प्रणालीमा प्रविष्ट गर्न निर्देशन दिएको छ।