महिलाहरूको सशक्त उपस्थितिले अन्तरिक्षमा नयाँ इतिहास 

अन्तरिक्ष यात्रा अब केवल विज्ञान र प्रविधिको सीमित परिधिमा मात्र छैन, यो अब विविधता, समानता र महिलाको सशक्त आवाजको प्रतिनिधित्व गर्ने नयाँ मञ्च बन्दैछ। यही सन्देशसहित १४ अप्रिल (वैशाख १) मा ६ प्रेरणादायी महिलाहरू अन्तरिक्ष पुगे।

पप संगीतदेखि नागरिक अधिकार, पत्रकारिता, विज्ञान र चलचित्र निर्माणसम्म फरक–फरक पृष्ठभूमिका यी महिलाहरूले पुरुषप्रधान अन्तरिक्ष मिसनमा महिलाको शक्तिशाली उपस्थिति देखाए। केटी पेरी, गेल किङ, अमान्डा इन्गुएन, आइशा बोवे, क्यारियन फ्लिन र लरेन सान्चेजले ब्लु ओरिजिनको न्यू शेपर्ड मिसनमार्फत ११ मिनेटको उप–कक्षीय यात्रा गरे।

यो मिसनले न केवल अन्तरिक्ष पर्यटनलाई नयाँ आयाम दियो, बरु “अन्तरिक्ष महिला–मैत्री पनि हुन सक्छ” भन्ने धारणा बलियो बनायो। नासाकी पूर्व वैज्ञानिक आइशा बोवेका अनुसार, “यो यात्रा केवल अन्तरिक्षसम्मको होइन, हाम्रो सम्भावनासम्मको यात्रा थियो।”

यस यात्राले सामाजिक सन्देश पनि बोकेको छ — महिलाहरू जहाँ चाहन्छन्, त्यहाँ पुग्न सक्छन्। विज्ञान, कला, अधिकार र मिडियाको प्रतिनिधित्व गर्ने यी ६ महिलाले अन्तरिक्षमा आफूहरूको आवाज मात्रै होइन, सम्पूर्ण महिलाहरूको सपना पनि उचालेका छन्।