मुम्बई, जेठ १२ — बलिउडका सुपरस्टार सलमान खानले हालै ‘द ग्रेट इन्डियन कपिल शो’को तेस्रो सिजनको उद्घाटन एपिसोडमा सहभागी हुँदै आफ्नो स्वास्थ्यसम्बन्धी एक गम्भीर रहस्य खुलासा गरेका छन्। चर्चित हास्य कलाकार कपिल शर्मासँगको रमाइलो कुराकानीकै क्रममा उनले आफू न्युरोसम्बन्धी जटिल रोगबाट पीडित रहेको जानकारी दिएका हुन्।

सलमानले भनेअनुसार, उनी ‘ट्राइजेमिनल न्यूराल्जिया’ नामक रोगसँग संघर्ष गरिरहेका छन्, जुन मस्तिष्कसँग सम्बन्धित एक प्रकारको असह्य पीडादायी अवस्था हो। यसका कारण उनी वर्षौँदेखि अनुहारको एक भागमा अत्यधिक दुखाइ भोगिरहेका छन्। साथै, उनले पहिलोपटक ‘ब्रेन एन्युरिज्म’ जस्तो गम्भीर स्वास्थ्य समस्याबाट पनि ग्रसित रहेको खुलाएका छन्।

“यो रोगका कारण कहिलेकाहीँ म सामान्य रूपमा बोल्न वा मुस्कान दिन पनि सक्दिनँ,” सलमानले भने, “तर जीवन अघि बढिरहन्छ।”

उनको यो स्वीकारोक्तिले लाखौँ प्रशंसकहरूलाई स्तब्ध तुल्याएको छ। सामान्यतः आफ्ना व्यक्तिगत कुराहरू गुप्त राख्ने सलमानले पहिलोपटक यति संवेदनशील विषय खुलाउनुले धेरैलाई प्रेरित बनाएको छ।

डाक्टरहरूको अनुसार, ट्राइजेमिनल न्यूराल्जिया न्युरोलोजीसम्बन्धी दुर्लभ अवस्था हो, जसले ट्राइजेमिनल स्नायु प्रणालीमा असर गर्छ। यसको उपचार चुनौतीपूर्ण भए पनि निरन्तर निगरानी र चिकित्सकीय सल्लाहले अवस्था सन्तुलनमा राख्न सकिन्छ।

बलिउडमा ‘भाइजान’को नामले चिनिने सलमानको यो स्वास्थ्य खुलासाले अब उनका आगामी चलचित्रहरू, कार्यक्रमहरूमा कस्तो प्रभाव पार्ला भन्ने चासो पनि बढेको छ।