नेकपा एमालेको राष्ट्रिय महाधिवेशन प्रतिनिधि परिषद्को बैठक शनिबारदेखि काठमाडौंमा सुरु भएको छ ।

ललितपुरको गोदावरीस्थित सनराइज हलमा शनिबार दिउँसो सुरु भएको बैठकमा देशका विभिन्न भागबाट आएका झण्डै २५ सय नेता तथा कार्यकर्ताको सहभागिता रहेको छ ।

सभामा प्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेपाली काँग्रेसका सभापति शेरबहादुर देउवालगायतका विशेष अतिथिलगायत राजनीतिक दलका शीर्ष नेताहरुलाई सम्बोधन गर्न आमन्त्रण गरिएको छ ।

कार्यक्रममा विशेष अतिथिका रुपमा प्रधानमन्त्री दाहाल र देउवाले सम्बोधन गर्ने कार्यक्रम छ ।

एमालेको भव्य भेलामा महासचिव शंकर पोखरेलले मिसन ग्रासरुट अभियानअन्तर्गत सञ्चालित झुलाघाट–चिवा भञ्ज्याङ यात्राको समीक्षा प्रस्तुत गर्ने छन् ।

साथै, आगामी दिनमा वार्षिक कार्य योजनाहरू व्यवस्थित गर्ने विषयमा पनि छलफल हुनेछ।

आजको बैठकमा पार्टी अध्यक्ष केपी ओलीले राजनीतिक प्रतिवेदन प्रस्तुत गरेका थिए भने महासचिव पोखरेलले संगठनात्मक प्रतिवेदन प्रस्तुत गरेका थिए ।

केन्द्रीय अनुशासन आयोग, केन्द्रीय लेखापरीक्षण आयोग, केन्द्रीय निर्वाचन आयोग र केन्द्रीय सल्लाहकार परिषद्का प्रतिनिधिहरूले पनि प्रतिवेदन प्रस्तुत गर्नेछन्।

एमाले प्रतिनिधि परिषद् बैठकको प्राविधिक पक्षलाई अभिवृद्धि गर्ने लक्ष्य राखेको छ । सहभागीहरूलाई मोबाइल एप मार्फत नेताहरूले प्रस्तुत गरेका कागजातहरूमा पहुँच प्रदान गरिएको छ, र सहभागीहरूबाट सुझावहरू पनि एप मार्फत सङ्कलन गरिनेछ।

बैठक वैशाख २२ गतेसम्म चल्ने बताइएको छ ।