स्वरोजगार सृजना गर्न सीपमा जोड
ललितपुर महानगरपालिकाका मेयर चिरीबाबु महर्जनले महानगरले स्वरोजगार र उद्यमशीलता सिर्जना र प्रवद्र्धन गर्न उपयोगी हुने सीपमूलक तालिम दिनुपर्नेमा जोड दिनुभएको छ ।
शुक्रबार यहाँ आयोजित अन्तरक्रियामा मेयर महर्जनले तालिम र सीपमूलक कार्यक्रमले सम्पन्नताको प्रमाणपत्र वितरण मात्र नभई स्थानीय तहमा सीप र रोजगारी प्रवद्र्धन गर्ने वातावरण सिर्जना हुने बताए ।
“आजको अन्तरक्रियामा सहभागीहरूले स्वरोजगार उन्मुख सीपलाई पनि जोड दिएका थिए। त्यसैगरी केही दिनअघि आयोजित सार्वजनिक सुनुवाइमा सहभागीहरूले तालिम योजनाहरू अत्यावश्यक रूपमा सञ्चालन गर्न सुझाव दिएका थिए,” उनले स्मरण गराए।
मेयर महर्जनले सुझाव र बजेटको उपलब्धतालाई ध्यानमा राखी यस्तो तालिम सञ्चालन गर्ने प्रतिबद्धता व्यक्त गरे ।
ललितपुर महानगरपालिकामा मात्रै अहिले ३० हजारभन्दा बढी युवा स्वरोजगारमा संलग्न रहेको बताउँदै उनले यो योजनामा महानगरपालिकाको संख्या बढाउने योजना रहेको बताए ।
रोजगार सेवा केन्द्रसँगको सहकार्यमा तय भएको कार्यक्रममा महिला र पिछडिएका समुदायलाई प्राथमिकता दिइएको उनको भनाइ छ ।
त्यसैगरी उपमेयर मञ्जली शाक्यले महानगरपालिकाले पूर्वाधार र निर्माण कार्यसँगै मानव विकास र युवालाई रोजगारीका लागि विशेष योजना कार्यान्वयन गर्दै आएको बताइन् ।
हस्तकला क्षेत्रलाई प्राथमिकतामा राखेर तालिम सञ्चालन गर्दै आएको बताउँदै उनले देशका युवालाई रोजगारीका अवसर सिर्जना गर्न महानगरले प्रतिबद्ध रहेको बताए ।