जापानले स्वास्थ्य सेवा क्षेत्रमा २० हजार नेपाली केयरगिभरहरूलाई रोजगारी दिने योजना सार्वजनिक गरेको छ। काठमाडौंमा सोमबार आयोजित एक कार्यक्रममा नेपाल–जापान सेवा आदानप्रदान कार्यक्रम अन्तर्गत यो घोषणा गरिएको हो।

कार्यक्रमलाई सफल बनाउन जापानका जेन्काउ रिसर्च इन्स्टिच्युट, कोजाइ कोसन कर्पोरेसन, प्रोग्रेसिभ स्टाफ एजेन्सी तथा नेपालका काठमाडौं विश्वविद्यालय स्कुल अफ मेडिकल साइन्स, सन एन्ड कम्पनी प्रालि र सान्दिपनी ग्रुप अफ एजुकेसनबीच समझदारीपत्रमा हस्ताक्षर भएको छ।

जापानको स्वास्थ्य सेवा क्षेत्रमा कामदारको माग उच्च रहेकाले नेपालीलाई दक्ष बनाउँदै रोजगारीको अवसर सिर्जना गर्न यो कार्यक्रम ल्याइएको हो। सान्दिपनी ग्रुप अफ कम्पनीका कार्यकारी निर्देशक नरेश ओझाका अनुसार, नेपालबाट जापान जाने प्रक्रिया सान्दिपनीले सम्हाल्नेछ।

योग्यता र प्रक्रिया

उमेर सीमा: १८ देखि ४५ वर्षसम्मका नेपाली सहभागी हुन योग्य।

शिक्षा: नर्सिङ अध्ययन अनिवार्य छैन।

भाषा: जापानी भाषा (एन-४ तह) उत्तीर्ण गर्नुपर्ने।

सीप परीक्षण: तोकिएको परीक्षा पास गर्नुपर्ने।

रोजगारी अवधि: ३ देखि ५ वर्ष।

रोजगारी प्रक्रिया

भाषा तथा सीप परीक्षामा सफल भएका उम्मेदवारहरूको अन्तर्वार्ता जापानी कम्पनीहरूले लिनेछन्। छनोट भएका व्यक्तिहरूलाई नेपालमै सूचना प्रविधि, एआईलगायतका तालिम दिइनेछ। रोजगारीका लागि जापान जाने नेपाली केयरगिभरहरूलाई जापानी कम्पनी पीएसएस खाइगोले विभिन्न स्थानमा नियुक्त गर्नेछ।

तलब र अवसरहरू

मासिक २ लाख जापानी येन सम्म तलब।

जापानको अत्याधुनिक स्वास्थ्य उपकरणहरूसँग काम गर्ने अवसर।

नेपाल फर्किएपछि केयरगिभिङ सेन्टर स्थापना गर्न प्रोत्साहन।

कार्यक्रमको महत्व

यो कार्यक्रमले नेपाली युवाहरूलाई अन्तर्राष्ट्रिय स्तरको स्वास्थ्य सेवा तालिम प्राप्त गर्ने अवसर दिनेछ। यसले नेपाल–जापान सम्बन्धलाई अझ बलियो बनाउने विश्वास गरिएको छ।