काठमाडौं – नेपाल र चीनबीचको व्यापारिक सम्बन्धमा लामो समयदेखि देखिँदै आएको असन्तुलनबारे उद्योग, वाणिज्य तथा आपूर्तिमन्त्री दामोदर भण्डारीले गम्भीर चासो व्यक्त गरेका छन्।

नेपाल हिमालय सीमापार वाणिज्य सङ्घको २५औँ वार्षिक साधारणसभा तथा रजत जयन्ती समारोहलाई सम्बोधन गर्दै मन्त्री भण्डारीले भने, “चीनसँगको व्यापारमा नेपालको ठूलो व्यापार घाटा छ, जसलाई अब घटाउनैपर्छ।”

उनले व्यापार घाटा कम गर्नका लागि घरेलु उत्पादनको निर्यात वृद्धि अपरिहार्य रहेको बताए। “हामीले जडीबुटी, हस्तकला, कृषि उपज र तयारी पोशाक जस्ता उत्पादनमा विशेष जोड दिनुपर्छ,” मन्त्री भण्डारीको भनाइ थियो।

नेपाल र चीनबीचको व्यापारलाई सन्तुलनमा ल्याउनका लागि नीतिगत र भौतिक पूर्वाधारमा सुधार गर्नु जरुरी रहेको औँल्याउँदै उनले निजी क्षेत्रसँग सहकार्य गर्दै सरकार अघि बढ्ने प्रतिबद्धता पनि जनाए।

व्यापारिक हिसाबमा चीन नेपालको दोस्रो ठूलो साझेदार हो तर नेपालले निर्यात गर्नेभन्दा आयात धेरै हुने भएकाले द्विपक्षीय व्यापारमा ठूलो असन्तुलन देखिएको छ।

अब भने सरकारको दृष्टि निर्यात प्रवर्द्धन र उत्पादकत्व वृद्धिमा केन्द्रित हुने संकेत मन्त्री भण्डारीको अभिव्यक्तिले दिएको छ।