विराटनगर, मोरङ — कोशी प्रदेशको व्यावसायिक राजधानी विराटनगर अब सीपका उज्यालो बत्तीहरूले झिलिमिलि हुने भएको छ। उद्योग सङ्गठन मोरङले जेठ १० र ११ गते आफ्नै सचिवालय परिसर, तीनपैनीमा ‘सीप उत्सव’ आयोजना गर्ने घोषणा गरेको छ।

दुई दिनसम्म चल्ने यो उत्सव केवल प्रदर्शनी मात्र नभई, सीप, सम्भावना र स्वरोजगारको यात्रालाई जीवन्त बनाउने अभियान हो। इन्स्योर हेल्भेटास नेपालको प्राविधिक सहयोगमा र कोशी प्रदेशको सामाजिक विकास मन्त्रालयको समन्वयमा, अन्य चार संस्थाहरूको सहभागितासहित आयोजना हुँदैछ यो कार्यक्रम।

 यो उत्सवमा सहभागीहरूलाई प्राविधिक तथा व्यवसायिक शिक्षाका थुप्रै अवसरहरूबारे जानकारी दिनुका साथै रोजगारदातासँग प्रत्यक्ष भेटघाटको सुविधा पनि दिइनेछ। स्टलहरूमा सीपयुक्त जनशक्तिको प्रदर्शनी, उद्यमशीलताको प्रेरणा दिने सत्रहरू, करियर काउन्सेलिङ, तालिम सूचना र विभिन्न संघ–संस्थाको प्रस्तुति पनि रहनेछ।

 रोजगारीको खोजीमा रहेका युवाहरूका लागि यो उत्सव नयाँ ढोका खोल्ने मौका हो। सीप सिकेर भविष्य निर्माण गर्न चाहनेहरूका लागि यहाँ अवसर, ज्ञान र सञ्जाल तीनवटै कुराको संगम हुनेछ।

 “हामीले सीपलाई रोजगारी र उद्यमशीलताको मूल स्रोतको रूपमा अघि सारेका छौं,” उत्सव आयोजक उद्योग सङ्गठन मोरङका एक पदाधिकारीले बताए। “यो उत्सवले युवाहरूलाई आत्मनिर्भर बन्न हौसला दिनेछ।”

सीप उत्सवमा सहभागिता जनाउनुहोस् – आफ्नो भविष्यलाई नया दिशा दिनुहोस्।