मोरङ–६ : अनिश्चित इतिहास, तर यसपटक पुराना दलबीच नै मुख्य प्रतिस्पर्धा

विराटनगर माघ १६, पूर्वकै सबैभन्दा अनिश्चित र चलायमान निर्वाचन क्षेत्र मानिने मोरङ क्षेत्र नम्बर–६ मा फागुन २१ गते हुने प्रतिनिधिसभा निर्वाचनलाई विशेष चासोका साथ हेरिएको छ। विगतमा मतदाताले बारम्बार नयाँ विकल्प रोज्दै आएको इतिहास भए पनि यसपटकको चुनावी गणितले भने मुख्य प्रतिस्पर्धा नेपाली काँग्रेस र नेकपा एमालेबीच नै केन्द्रित हुने संकेत गरेको छ।

मोरङ–६ अन्तर्गत बुढीगंगा गाउँपालिका,सुन्दरहरैंचा नगरपालिका वडा नं २ र ७, तथा विराटनगर महानगरपालिका वडा नं ४, ७, ९ र ११ पर्दछन्।

निर्वाचन आयोगका अनुसार यस क्षेत्रमा १ लाख ३७ हजार ८ सय ३२ मतदाता रहेका छन्।

एक उपनिर्वाचनसहित मोरङ–६ मा हालसम्म ८ पटक निर्वाचन भइसकेको छ। तीमध्ये एउटा बाहेक सबै निर्वाचनमा मतदाताले नयाँ प्रतिनिधि चयन गरेका छन्। यही कारण यो क्षेत्रलाई पूर्वकै सबैभन्दा अनिश्चित निर्वाचन क्षेत्रका रूपमा लिने गरिन्छ।

यसपटक पनि मतदाताले पुरानै स्वभाव दोहोर्याउँछन् कि स्थायित्व रोज्छन् भन्ने प्रश्नले चुनावलाई थप चासोपूर्ण बनाएको छ।

२०७९ को निर्वाचन परिणामले मोरङ–६ को वास्तविक शक्ति सन्तुलन प्रस्ट पारेको छ।
प्रतिशतका आधारमा:

नेपाली काँग्रेस: ४३.८० प्रतिशत

नेकपा एमाले: २८.५३ प्रतिशत

रास्वपा: ११.३६ प्रतिशत

राप्रपा: ११.१० प्रतिशत

नयाँ र साना दलले उल्लेख्य मत ल्याए पनि काँग्रेस–एमालेको संयुक्त मत ७० प्रतिशतभन्दा माथि रहेकाले निर्णायक प्रतिस्पर्धा पुराना दलमै सीमित देखिएको विश्लेषण गरिएको छ।

बुढीगंगा गाउँपालिकामा काँग्रेस र एमालेबीच सिधा प्रतिस्पर्धा छ। सुन्दरहरैंचाका अर्धशहरी वडामा एमालेको संगठनात्मक प्रभाव बलियो देखिन्छ। विराटनगरका शहरी वडामा रास्वपा र राप्रपाको उपस्थिति देखिए पनि त्यो मत काट्ने तहमा सीमित रहने सम्भावना बढी रहेको स्थानीय राजनीतिक विश्लेषकहरू बताउँछन्।

यसपटक मोरङ–६ मा प्रमुख दल तथा साना दलका उम्मेदवार यसप्रकार छन्—नेपाली काँग्रेसबाट शेखर कोइराला,नेकपा एमालेबाट विनोद ढकाल,कम्युनिस्ट पार्टीबाट ओपेन्द्र कुमार राय,रास्वपाबाट रुबिना आचार्य, श्रम पार्टीबाट मात्रिका पौडेल लगायत

उम्मेदवारको सूची हेर्दा नयाँ र पुराना अनुहारबीच प्रतिस्पर्धा देखिए पनि चुनावी गणितले भने ठूला दलकै उम्मेदवारहरूबीच मुख्य भिडन्त हुने संकेत गरेको छ।

नयाँ दलको प्रभाव, तर निर्णायक होइन

रास्वपा र राप्रपाले शहरी तथा युवा मतदातामा प्रभाव जमाएका छन्। तर उनीहरूको प्रभाव प्रतिस्पर्धालाई त्रिपक्षीय बनाउने भन्दा पनि काँग्रेस–एमालेको मत घटाउने भूमिकामा सीमित देखिन्छ।

मोरङ–६ को इतिहास परिवर्तनमुखी भए पनि यसपटकको चुनावी तथ्यांक र वडागत गणितले जित–हारको मुख्य फैसला नेपाली काँग्रेस र नेकपा एमालेबीच नै हुने संकेत गरेको छ।

अब प्रश्न एउटै छ—कुन दलले आफ्ना परम्परागत मत जोगाउन सक्छ? त्यसको उत्तर मतपेटिकाले दिनेछ।