शिशु सेवा समितिको वार्षिकोत्सवमा चार सम्मानित

विराटनगर — शिशु सेवा समिति विराटनगर ले आफ्नो ४२औं वार्षिकोत्सवको अवसरमा विभिन्न क्षेत्रमा योगदान पुर्‍याएका चार व्यक्तित्वलाई सम्मान गरेको छ।

विराटनगर–२ स्थित सनातन सामुदायिक सेवा भवनमा शनिबार आयोजित कार्यक्रममा “राष्ट्रिय आदर्श आमा पुरस्कार २०८२” भेषकुमारी दाहाल लाई प्रदान गरिएको हो। अत्यन्तै कठिन आर्थिक अवस्थाका बाबजुद आफ्ना सन्तानलाई शिक्षित र सक्षम बनाएको योगदानको कदरस्वरूप उनलाई नगद १५ हजार १०१ रुपैयाँसहित सम्मान गरिएको हो।

यसैगरी “बाल साहित्य पुरस्कार” भवानीप्रसाद पोखरेल, “शान्ता राष्ट्रिय उत्कृष्ट बाल पुरस्कार २०८२” रागिनी गौतम तथा “शिशु सेवा पत्रकारिता पुरस्कार” वाबुराम भण्डारी लाई प्रदान गरिएको छ। यी पुरस्कारहरूको राशि जनही ११ हजार १११ रुपैयाँ रहेको छ।

कार्यक्रममा भीम पराजुली (कोशी प्रदेश सरकारका पर्यटन, वन तथा वातावरणमन्त्री) ले धर्म, संस्कार र समाजसेवामा निरन्तर सहयोग गर्ने प्रतिबद्धता व्यक्त गरे।

त्यसै अवसरमा सम्पन्न साधारणसभाले नयाँ कार्यसमिति सर्वसम्मत चयन गरेको छ। समितिको सभापतिमा कविराज न्यौपाने पुनः चयन भएका छन्। उपसभापतिमा मञ्जु रिजाल र डा. भेषप्रसाद धमला, सचिवमा धर्मराज भट्टराई, सहसचिवमा पुष्पलता कोइराला तथा कोषाध्यक्षमा शोभा पोखरेल चयन भएका छन्।

संस्थाको स्थापना करिब ४२ वर्षअघि समाजसेवी शान्ता पोखरेल को प्रेरणामा कोशी अञ्चल अस्पतालको बाल वार्डमा रहेका शिशुहरूको उपचारमा सहयोग गर्ने उद्देश्यले गरिएको थियो। हालसम्म पनि संस्थाले समाजसेवा तथा बालहितका क्षेत्रमा निरन्तर काम गर्दै आएको छ।