अब तलब दुई किस्तामा: सरकारी भुक्तानी प्रणालीमा परिवर्तन

काठमाडौं । अर्थ मन्त्रालय ले सरकारी कर्मचारीको तलब भुक्तानी प्रणालीमा परिवर्तन गर्ने निर्णय गरेको छ। अब कर्मचारीहरूले मासिक होइन, महिनामा दुई पटक तलब पाउने भएका छन्।

हालसम्म एकमुष्ट रूपमा आउने तलबलाई अर्धमासिक बनाउने तयारी अन्तर्गत मन्त्रालयले महालेखा नियन्त्रक कार्यालय लाई आवश्यक व्यवस्था मिलाउन निर्देशन दिइसकेको छ।

यस निर्णयसँगै अब कर्मचारीले प्रत्येक महिनामा दुई किस्तामा रकम प्राप्त गर्नेछन्। सरकारले यसलाई नगद प्रवाह व्यवस्थापनलाई सहज बनाउने उपायका रूपमा लिएको छ।

अर्थ मन्त्रालयका अनुसार नयाँ प्रणालीले तलब वितरणलाई अझ व्यवस्थित, पारदर्शी र समयमै हुने बनाउने अपेक्षा गरिएको छ। सम्बन्धित निकायहरूलाई छिटो प्राविधिक तथा प्रशासनिक तयारी पूरा गर्न पनि आग्रह गरिएको छ।

 अब सरकारी कर्मचारीले एकैचोटि ठूलो रकम पाउने होइन, दुई चरणमा नियमित रूपमा तलब पाउनेछन्—जसले व्यक्तिगत आर्थिक योजना बनाउन केही हदसम्म सजिलो बनाउने विश्वास गरिएको छ।