आज अक्षय तृतीया : पुण्य र समृद्धिको विशेष दिन

काठमाडौँ । आज वैशाख शुक्ल तृतीयाका दिन मनाइने अक्षय तृतीया पर्व धार्मिक आस्था र परम्पराले भरिएको महत्वपूर्ण दिनका रूपमा मनाइँदैछ। हिन्दू धर्मअनुसार आज गरिएको जप, तप, दान र पूजाको फल कहिल्यै नष्ट नहुने—अर्थात् ‘अक्षय’ रहने विश्वास छ।

धार्मिक ग्रन्थहरू जस्तै मत्स्य पुराण र भविष्य पुराण मा उल्लेख भएअनुसार आजको दिन अत्यन्त फलदायी मानिन्छ। यसै दिनबाट त्रेता युगको प्रारम्भ भएको विश्वास छ भने भगवान् परशुराम को जन्मजयन्तीका रूपमा पनि मनाइन्छ।

यस दिन बिहानै स्नान गरी लक्ष्मी–नारायणको पूजा गर्ने परम्परा छ। साथै, जौको सातु, गुड, दही र घिउ मिसाएर बनाइएको सर्वत दान गर्ने चलन रहेको छ। माटो, तामा वा पित्तलको घडामा सर्वत राखी दान गर्दा ब्रह्मा, विष्णु र महेशको आशीर्वाद प्राप्त हुने धार्मिक विश्वास रहेको छ।

धर्मशास्त्रविद्हरूका अनुसार आज निराहार व्रत बसेर विष्णुको पूजा गर्दा ठूलो यज्ञसरहको पुण्य प्राप्त हुने मान्यता छ। यस अवसरमा दान, सेवा र अतिथि सत्कारलाई विशेष महत्व दिइन्छ।

गर्मीको मौसममा जौको सातु र सर्वत सेवनले स्वास्थ्यमा पनि फाइदा पुर्‍याउने भएकाले यो पर्व धार्मिक मात्र नभई व्यावहारिक रूपमा पनि उपयोगी मानिन्छ।

 यसरी, अक्षय तृतीया धार्मिक आस्था, सामाजिक सद्भाव र स्वास्थ्यसँग जोडिएको एक विशेष पर्वका रूपमा देशभर श्रद्धाका साथ मनाइँदैछ।