उपत्यकाको विकास सामूहिक रुपमा गर्नुपर्छ : मेयर शाह

काठमाडौं महानगरपालिकाका मेयर बलेन्द्र शाहले काठमाडौं उपत्यकाका तीनवटै जिल्लाको विकास एकैसाथ अघि बढ्नुपर्ने बताएका छन् ।

ललितपुर महानगरपालिकाको १०५औँ वार्षिकोत्सवको अवसरमा सोमबार आयोजित कार्यक्रमलाई सम्बोधन गर्दै मेयर शाहले उपत्यकाको सौन्दर्य अभिवृद्धि गर्न महानगरको विकास हुनुपर्ने बताए ।

उनले संघीय र स्थानीय तहका कानुनबीचको द्वन्द्वका कारण उपत्यकाको समग्र विकासमा कठिनाइ भएको बताए ।

‘काठमाडौं र ललितपुर महानगरपालिकाबीचको सम्बन्ध छ ।

 केएमसीले मात्रै प्रगति गर्दा राम्रो लाग्दैन । उपत्यका बाहिरका मानिसहरूले उपत्यकाका तीनवटै जिल्लालाई समग्र रूपमा लिन्छन्। त्यसैले सिंगो उपत्यकाको एकैचोटि सर्वाङ्गीण विकास हुनुपर्छ र त्यसका लागि सबै नगरपालिका पनि एकैसाथ अघि बढ्नुपर्छ । यसबारे स्थानीय तहमा मेयर र उपमेयरबीच छलफल गर्न सकिन्छ, तर संघीय र स्थानीय तहको कानुनबीच विवाद छ,’ उनले भने ।

मेयर शाहले काठमाडौं महानगरपालिकाको भग्नावशेषको दीर्घकालीन व्यवस्थापनका लागि संघीय सरकारले बनाएको अवरोध हटाउन प्रधानमन्त्री पुष्पकमल दाहाल ‘प्रचण्ड’सँग आग्रह गरे । उनले खोला अतिक्रमणका लागि आवश्यक पहल गर्न सरकारसँग आग्रह गरे ।

केही काम र परिवर्तन मेयर र स्थानीय तहबाट एक्लै गर्न सकिँदैन। त्यसका लागि संघीय सरकारको सहयोग हुनुपर्छ ।

उनले केएमसीलाई हलुका बनाउने प्रयासमा प्रदेश सरकारले खलबलिएको भन्दै असन्तुष्टि जनाए । तीनै तहका सरकार एकसाथ अघि बढेपछि काठमाडौं उपत्यकाको विकासले गति लिन्छ ।