हरियाली अभियन्ता नेपालगन्जका हेमन्तराज काफाले भारतको हरियाणामा अन्तर्राष्ट्रिय पुरस्कारबाट सम्मानित भएका छन् ।

हरियाणामा सोमबार समापन भएको लेक्स फाउन्डेसनले आयोजना गरेको दुईदिने अन्तर्राष्ट्रिय कार्यक्रममा उनलाई ‘अन्तर्राष्ट्रिय ट्री म्यान अवार्ड’बाट सम्मान गरिएको हो ।

पर्यावरण संरक्षण र दिगो विकासमा कफालेको उत्कृष्ट योगदानको कदर गर्दै यो पुरस्कार उनलाई हरियाणा विधान सभाका सदस्य मोहन लाली बडोलीले प्रदान गरेका थिए।

काफाले यसअघि नै समरस्ता इन्टरनेशनल अवार्ड इन्डिया–२०२०, डब्लुडब्लुएफ कन्जर्भेसन अवार्ड–२०२१ र एभरेष्ट इन्टरनेशनल क्लाइमेट एक्सन अवार्ड प्राप्त गरिसकेका छन् ।

उनको हरित प्रवर्द्धनका पहलहरूमा देश बाहिरबाट उपहारस्वरूप प्राप्त कल्पवृक्षको बीउ अंकुराउने र बिरुवामा हुर्काउने समावेश छ। त्यसपछि यी बिरुवा बाँकेका विभिन्न धार्मिक स्थलमा रोपिन्छन् ।

कल्पवृक्ष अभियानअन्तर्गत उनले काठमाडौंको पशुपतिनाथ, सुर्खेतको देउती बजई, सल्यानको छत्रेश्वरी, प्युठानको स्वर्गद्वारी, नेपालगञ्जको हनुमानगढीलगायत महत्वपूर्ण स्थानमा वृक्षारोपण गरिसकेका छन् ।

उनले साझा गरेझैं उनले मानिसहरूलाई उनीहरूको जन्मदिनको विशेष अवसरहरूमा कल्पवृक्ष र सिताल चिनी (मोरिंगा ओलिफेरा) को नर्सरी बिरुवाहरू उपहार दिन्छन्।

यसका साथै उनले मोरिङ्गा बिरुवा वितरणको अभियान थालेकाले मोरिङ्गा र कल्पवृक्ष रोप्ने संस्कृति सिमानाबाहिर फैलिदै गएकाले यसको व्यापक पहिचान हुन थालेको छ ।