धरानको लामो समयदेखिको पानी समस्या समाधानका लागि मेयर साम्पाङ्गले मंगलबार प्रधानमन्त्री केपी शर्मा ओली र खानेपानी मन्त्री प्रदीप यादवसँग भेट गर्न सिंहदरबार प्रवेश गरेका हुन्।

खानेपानी मन्त्रालयलाई पटक-पटक अपिल गर्दा पनि कुनै प्रभावकारी कदम नचलेपछि मेयर साम्पाङ्गले काठमाडौं आएर सरकारलाई दीर्घकालीन समाधानका लागि दबाब दिनुपर्ने अवस्था आएको बताए।

यसअघि, सोमबार मेयर साम्पाङ्ग काठमाडौं आएका थिए र धरानको पानी अभावलाई जनाउन खाली गाग्री बोकेका थिए। तर, सुरक्षा कारण देखाउँदै प्रहरीले सिंहदरबारको दक्षिण ढोकामा गाग्री जफत गरेको थियो।

तर, उनले हार मानेनन् र खाली हात सिंहदरबार प्रवेश गरे। मेयर साम्पाङ्गले धरानको पानी समस्याको समाधान नभएसम्म सरकारलाई दबाब दिन आफूले निरन्तर प्रयास गर्ने बताए। उनको मुख्य माग साप्‍तकोशी नदीबाट धरानसम्म पानी ल्याउन आवश्यक परियोजनाका लागि केन्द्रीय सरकारले बजेट छुट्याउनु हो।