नेपाली कांग्रेसका सभापति शेरबहादुर देउवाले नेपालले विदेशी सहायता राष्ट्रिय हितका लागि स्वीकार गर्न सक्ने धारणा राखेका छन्।

बुधबार नेपाली कांग्रेसको आर्थिक नीति तथा योजना विभागले सानेपामा आयोजना गरेको कार्यक्रममा बोल्दै देउवाले नेपालको प्रत्यक्ष हित हुने क्षेत्रमा विदेशी सहायता लिनु महत्त्वपूर्ण रहेको बताए।

उनले विदेशी सहायता धेरैले आलोचना गर्ने गरेको स्वीकार गर्दै, तर रणनीतिक रूपमा उपयोग गर्न सकिएमा यो लाभदायक हुने स्पष्ट पारे। उनले विभिन्न अन्तर्राष्ट्रिय संस्थाहरूले नेपाललाई अनुदान प्रदान गर्ने गरेको र केही ऋणहरू अन्ततः अनुदानमा परिणत हुने गरेको उल्लेख गरे।

मिलेनियम च्यालेन्ज कर्पोरेशन (एमसीसी) कम्प्याक्टको उदाहरण दिँदै उनले प्रारम्भिक विरोध भए पनि पछि यसले नेपालको हितमा काम गरेको प्रस्ट भएको बताए। “नेपालमा एमसीसी पारित गराउन गाह्रो भयो। तर अहिले सबैले बुझिसकेका छन् कि यो अनुदान हो, ऋण होइन। यसले हामीलाई फाइदा पुर्‍याएको छ,” उनले भने।

देउवाले भारत र चीनबीचको भू-राजनीतिक अवस्थाले नेपालको नीतिमा प्रभाव पर्ने स्वीकार गर्दै, नेपालले आफ्नो हितमा हुने ऋणमात्रै स्वीकृत गर्नुपर्नेमा जोड दिए। “हामीले विश्व बैंक, एसियाली विकास बैंक, जापान र कोरियाबाट ऋण लिएका छौं, तीमध्ये केही पछि अनुदानमा परिणत भए। हामीले हाम्रो हितमा हुने ऋण छनोट गर्न आवश्यक छ,” उनले थपे।