५ अर्ब बक्यौता नपाएका दुग्ध किसानको पीडा संसदमा गुञ्जियो

काठमाडौँ, असार २५ – प्रतिनिधिसभाको सोमबारको बैठकमा दुग्ध किसानको भुक्तानी नपाएको विषयमा सांसद अच्युतप्रसाद मैनालीले सरकारको ध्यानाकर्षण गराएका छन्।

सांसद मैनालीले उल्लेख गरे अनुसार, देशभरका लाखौं किसानले ६ महिनासम्म दूधको भुक्तानी नपाउँदा आफ्नो दैनिकी चलाउन मुस्किल परेको छ। 

 डीडीसी र निजी डेरीहरूबाट किसानले पाउनुपर्ने झण्डै ५ अर्ब रुपैयाँ बक्यौता अझै नआएको बताउँदै उनले गम्भीर चिन्ता व्यक्त गरे।

“जनताको जीवनधारा रहेको कृषि पेशामा यति ठूलो अन्याय हुनु लज्जास्पद हो,” सांसद मैनालीले भने, “किसान बाँचेनन् भने देशले स्वाभिमानी उत्पादन पनि गुमाउँछ।”

उनले सरकारसँग तत्काल पहल गर्न र किसानलाई उचित समयमै भुक्तानी सुनिश्चित गर्न माग गरे।