काठमाडौं, असार २९ – नेपाली भाषा, साहित्य र राष्ट्रिय एकताको प्रतीक आदिकवि भानुभक्त आचार्यको २१२ औं जन्मजयन्ती आज देशभर विविध कार्यक्रमसहित भव्य रूपमा मनाइएको छ।

राष्ट्रिय प्रज्ञा प्रतिष्ठानले काठमाडौंमा आयोजना गरेको विशेष समारोहमा प्रभातफेरी, साहित्यिक गोष्ठी र सम्मान कार्यक्रम समावेश गरिएका थिए। कार्यक्रममा सम्माननीय सभामुख देवराज घिमिरे, शिक्षा, विज्ञान तथा प्रविधि मन्त्री रघुजी पन्त, नेपाल प्रज्ञा–प्रतिष्ठानका कुलपति डा. नवराज लम्साल, विशिष्ट साहित्यकार, संस्कृतिविद् तथा विद्यार्थीहरूको उपस्थिति थियो।

कार्यक्रमको विशेष आकर्षणका रूपमा लामो समयदेखि नेपाली भाषा, संस्कृतिको संरक्षणमा योगदान पुर्‍याउँदै आएका वरिष्ठ साहित्यकार तथा संस्कृतिविद् तुलसी दिवसलाई विशेष सम्मानसहित अभिनन्दन गरियो।

 प्रतिष्ठानको तर्फबाट प्रदान गरिएको सम्मानपत्र, दोसल्ला र माला अर्पण गर्दै उहाँको योगदानलाई भावपूर्ण ढंगले स्मरण गरियो।

कार्यक्रममा सहभागी साहित्यकारहरूले भानुभक्त आचार्यको योगदानलाई राष्ट्रिय गौरवको रूपमा व्याख्या गरे।

नेपाल प्रज्ञा–प्रतिष्ठानका कुलपति डा. नवराज लम्सालले भने, “भानुभक्त नेपाली साहित्यको मेरुदण्ड हुनुहुन्छ। उहाँले नेपालीलाई आफ्नै भाषामा धर्म, दर्शन र संस्कृतिको रसास्वादन गराउने बाटो खोल्नुभयो।”

सम्मानित साहित्यकार तुलसी दिवसले भावुक हुँदै भने, “भानु जयन्ती कुनै जात वा क्षेत्रको विषय होइन, यो सम्पूर्ण नेपालीको साझा चाड हो। उहाँले हामीलाई भाषिक एकताको सूत्रमा बाँध्नुभयो।”

विराटनगरका साहित्यकार तथा प्राध्यापक कविराज न्यौपानेले भानुभक्त आचार्यप्रतिको सन्दर्भमा विचार व्यक्त गर्दै भने, “भानुभक्त आचार्यलाई आजका युवा पुस्ताले केवल पाठ्यपुस्तकमा सीमित एक पात्रको रूपमा मात्र होइन, राष्ट्रप्रेमले ओतप्रोत भाषासेवी र सांस्कृतिक अग्रदूतका रूपमा बुझ्न अत्यन्त आवश्यक छ। उहाँले नेपाली साहित्यलाई सामाजिक र सांस्कृतिक एकताको सूत्रमा बाँध्दै एक नवीन आयाम प्रदान गर्नुभएको छ। त्यसलाई समुन्नत ढंगले अघि बढाउनु हामी सबैको साझा उत्तरदायित्व हो। मातृभाषाको संरक्षण, प्रवर्द्धन र सृजनात्मक साहित्यको मार्गमा निरन्तर लागिरहन उहाँले समस्त पुस्तालाई प्रेरित गर्नुभएको छ, जुन आजको सन्दर्भमा झनै सान्दर्भिक र प्रेरणादायी बनेको छ।”

साँझको सेरोफेरोमा भएको सांस्कृतिक कार्यक्रममा विभिन्न साहित्यिक समूहहरूले भानुभक्तको काव्य–सृजनाको वाचन, गीत, नृत्य तथा भजन प्रस्तुत गरेका थिए। भानुभक्तका बाल्यकालदेखि रामायण अनुवादसम्मको यात्रा देखाउने दृश्य–चित्रले कार्यक्रमलाई जीवन्त बनायो।

भानु जयन्तीको अवसरमा देशैभरि विद्यालय, स्थानीय तह, साहित्यिक संस्था र समुदायस्तरमा विभिन्न कार्यक्रमहरू आयोजना गरिएका छन्। कतै भानुभक्तको मूर्तिमा माल्यार्पण, कतै कविता प्रतियोगिता, कतै भाषिक गोष्ठी।

यसरी २१२ औं भानु जयन्ती नेपाली समाजमा मातृभाषाप्रतिको प्रेम, सम्मान र चेतनालाई पुनः जागृत गर्ने अवसर बनेको छ।