छथर जोरपाटीमा ९औं हरिराज खेवा स्मृति दिवस : पर्यटन, संस्कृति र शिक्षालाई जोड्दै

धनकुटा, श्रावण १३ – छथर जोरपाटी गाउँपालिका–६ मा निर्माणाधीन हरिराज खेवा स्मृति पार्कमा आज ९औं हरिराज खेवा स्मृति दिवस भव्यतासहित सम्पन्न भयो। 

समारोहले गाउँको पहिचानलाई पर्यटन, संस्कृति र शिक्षासँग जोड्दै स्थानीय समृद्धिको नयाँ दृष्टिकोण प्रस्तुत गर्‍यो।

गाउँपालिका अध्यक्ष छत्र सुब्बाले धुपीको बिरुवा रोपेर उद्घाटन गर्दै, पार्कलाई आकर्षक पर्यटन गन्तव्यका रूपमा विकास गर्ने प्रतिबद्धता व्यक्त गरे। उनले भने, “गाउँको प्राकृतिक सौन्दर्य र यहाँको ऐतिहासिक महत्त्वलाई उपयोग गर्दै स्मृति पार्कलाई भविष्यमा छथर जोरपाटीको मुख्य आकर्षण बनाइनेछ।”

गाउँपालिका उपाध्यक्ष तथा प्रतिष्ठानकी संरक्षक गीता गुरुङ खेवाले स्मृति पार्कलाई स्थानीय रोजगारी र आय वृद्धिको आधार बनाउने योजनाको चर्चा गरिन्। “हरिराज खेवाको सुन्दर गाउँको सपना अब साकार हुँदैछ। पर्यटनसँगै आर्थिक सशक्तिकरणको बाटो खुल्नेछ,” उनले भनिन्।

त्यस्तै, पूर्व प्रदेशसभा सदस्य कुशुम श्रेष्ठले पार्कलाई शिक्षा, संस्कृति र वातावरण संरक्षणको साझा केन्द्रका रूपमा स्थापित गर्ने दृष्टिकोण स्पष्ट भएको बताइन्।

कार्यक्रम महासचिव विष्णुमाया कन्दङबा कविताको संयोजनमा सञ्चालन भयो। समारोहमा:

धुपी प्रजातिका वृक्षारोपण गर्दै पार्कलाई हरियाली र वातावरणमैत्री बनाउने पहल।

जग्गादाता धनबहादुर लिम्बु र खोजबहादुर राईलाई विशेष सम्मान।

१०२ वर्षीय अन्नपूर्ण गुरुङ र ८९ वर्षीय डम्बरबहादुर थापालाई ‘जेष्ठ नागरिक सम्मान’।

२०८१ सालको SEE परीक्षामा उत्कृष्ट नतिजा ल्याउने विद्यार्थीलाई नगदसहित सम्मानपत्र प्रदान:

प्राविधिक तर्फ: सम्राट लिम्बु (३.६८ GPA) र कृतिका भुजेल (३.४१ GPA)

साधारण तर्फ: सृष्टि लिम्बु (३.५३ GPA) र अन्जली गुरुङ (३.५२ GPA)

कार्यक्रममा बैंक तथा वित्तीय संस्थाका प्रतिनिधि, स्थानीय समाजसेवी, कर्मचारी, संघ–संस्थाका प्रतिनिधि र स्थानीय बासिन्दाहरूको उल्लेखनीय उपस्थिति रहेको थियो।