काठमाडौं, श्रावण  २३ — नेपाली कांग्रेसका शीर्ष नेताहरूबीच पार्टीभित्र देखिएको आन्तरिक समस्या समाधानका लागि साढे दुई घण्टासम्म गोप्य बैठक बसेको छ।

सभापति शेरबहादुर देउवाको बूढानीलकण्ठस्थित निवासमा बिहीबार बिहान १० बजेदेखि साढे १२ बजेसम्म चलेको बैठकमा उपसभापति पूर्णबहादुर खड्का, महामन्त्रीद्वय गगन थापा र विश्वप्रकाश शर्मा सहभागी थिए।

बैठकमा पार्टीभित्र चुलिँदो क्रियाशील सदस्यता विवाद, महाधिवेशनको प्रक्रिया, भ्रातृसंस्थाहरूको महाधिवेशन तथा जिल्लास्तरीय विवादबारे गहन छलफल भएको महामन्त्री गगन थापाले जानकारी दिए। उनका अनुसार बैठकमा चार मुख्य विषयमा केन्द्रित छलफल गरिएको थियो।

असार मसान्तसम्म टुङ्ग्याउने भनिएको क्रियाशील सदस्यता नवीकरण प्रक्रिया केन्द्रीय कार्यसमितिको निर्णयअनुसार असोज मसान्तसम्म लम्बिएको छ। यो समयभित्र जिल्लाजिल्लामा देखिएको विवाद समाधान गर्ने विषयमा छलफल भएको थापाले बताए।

१४औँ महाधिवेशन सम्पन्न भएको तीन वर्षभन्दा बढी भइसक्दा पनि केही जिल्लामा त्यसबेलाको विवाद अझै समाधान हुन सकेको छैन। विशेष गरी सर्लाही, बारा र धादिङ जिल्लामा जिल्ला कार्यसमिति नै निष्क्रियजस्तो अवस्थामा रहेको बताइएको छ।

पार्टीले अन्तिम पटकको म्याद थप गर्दै महाधिवेशन गर्न निर्देशन दिएको सात भ्रातृसंस्थाहरूको विषयमा पनि छलफल भएको थियो। ती संस्थाहरूलाई प्रभावकारी रूपमा महाधिवेशनतर्फ लैजान निर्देशन समितिलाई कार्यादेश (टीओआर) दिने विषयमा छलफल भएको हो।

पार्टीले जिल्ला विवाद समाधानका लागि अर्को सातादेखि क्रमशः एक-एक जिल्ला पदाधिकारीलाई काठमाडौं बोलाएर संवाद गर्ने निर्णय गरेको छ। सभापति देउवाको समय अनुसार दिनहुँ एक-एक जिल्लालाई बोलाएर समस्या समाधान गर्ने पहल गरिने महामन्त्री थापाले जानकारी दिए।

बैठकमा पार्टी सांसद एवं राज्य व्यवस्था तथा सुशासन समिति सभापति रामहरि खतिवडालाई फिर्ता बोलाउने वा नबोलाउने भन्ने विषयमा भने कुनै छलफल नभएको थापाले प्रष्ट पारे। उनका अनुसार यो बैठक पूर्ण रूपमा पार्टीको आन्तरिक व्यवस्थापनमा केन्द्रित थियो।

कांग्रेसभित्रको आन्तरिक असन्तुलन र ढिलासुस्ती महाधिवेशन प्रक्रियाबाट पुनः सतहमा आएको छ। नेताहरूको नियमित संवाद सकारात्मक भए पनि विवाद समाधानका पक्षमा ठोस कार्यान्वयन देखिनु अझै बाँकी छ।