देउवा पुनः सार्वजनिक, कांग्रेस बैठकबाट सुरु हुँदै ‘घाइते नेतृत्वको पुनरागमन यात्रा’

काठमाडौं असाेज २८, जेन–जी आन्दोलनको आक्रमणपछि पहिलोपटक कांग्रेस सभापति शेरबहादुर देउवा आज पार्टीको केन्द्रीय कार्यसमिति बैठकमा सहभागी हुँदैछन् । बूढानीलकण्ठमा भएको राजनीतिक हिंसात्मक घटनापछि महिनौँ सार्वजनिक रूपमा नदेखिएका देउवा अहिलेको बैठकमार्फत पार्टीभित्र आफ्नो उपस्थितिको सन्देश दिन लागेका हुन् ।

दिउँसो १ बजे सानेपास्थित पार्टी मुख्यालयमा बस्ने बैठकलाई कांग्रेसको ‘पुनर्संरचना र पुनर्जागरण’ को शुरुवातका रूपमा हेरिएको छ । देउवामाथिको आक्रमणले पार्टी नेतृत्वको असुरक्षा र आन्तरिक अस्थिरता उजागर गरेको अवस्थामा आजको बैठकले पार्टीभित्रको दिशा र ऊर्जा कता मोडिन्छ भन्ने संकेत दिने अपेक्षा गरिएको छ ।

मुख्यसचिव कृष्णप्रसाद पौडेलका अनुसार बैठकमा जेन–जी आन्दोलनपछिको राजनीतिक समीकरण, आगामी महाधिवेशनको तयारी र संगठन पुनःगतिशील बनाउने रणनीति मुख्य विषय हुनेछन् । तर, बैठकअघि शीर्ष नेताहरूबीच एजेन्डा टुंग्याउन नसक्नुले पार्टीभित्र मतभिन्नता अझै बलियो रहेको संकेत गरेको छ ।

महामन्त्रीद्वय गगन थापा र विश्वप्रकाश शर्माले मंसिरभित्रै १५औँ महाधिवेशन गर्नुपर्ने प्रस्ताव अघि सारेका छन् । नेतृत्व हस्तान्तरणको बहसले देउवा–पछिको कांग्रेस नेतृत्वको स्वरूप कस्तो हुने भन्ने प्रश्न फेरि उठाएको छ ।

पार्टीभित्र देउवाको आजको उपस्थितिलाई धेरैले ‘राजनीतिक प्रतीक’ का रूपमा व्याख्या गर्न थालेका छन् । एक तर्फ घाइते सभापति पुनः सार्वजनिक हुँदैछन्, अर्कोतर्फ कांग्रेस आन्तरिक संक्रमणको मोडमा छ — यही सन्दर्भले आजको बैठकलाई सामान्य औपचारिकता होइन, देउवा युगको उत्तरार्धको संकेत मानिँदैछ ।