मधेस प्रदेशमा नयाँ सत्ता समीकरण : सोनलको मुख्यमन्त्री दाबीपछि राजनीति तातियो

धनुषा असाेज २९, मधेस प्रदेशमा सत्ता समीकरण फेरिँदै गएको छ। लोकतान्त्रिक समाजवादी पार्टी (लोसपा)का उपाध्यक्ष जितेन्द्र सोनलले मुख्यमन्त्रीको दाबी प्रस्तुत गरेसँगै प्रदेश राजनीति नयाँ दिशातर्फ मोडिएको छ।

सोनलले बुधबार प्रदेश प्रमुखसमक्ष दाबी पेश गरेका हुन्। उनको दाबीलाई नेकपा (माओवादी केन्द्र), जनमत पार्टी, जनता समाजवादी पार्टी (जसपा) र नेकपा (एकीकृत समाजवादी)ले समर्थन गरेका छन्। यो गठबन्धनले नेपाली कांग्रेस र नेकपा एमालेलाई बाहिर राख्दै नयाँ सरकार बनाउने तयारी गरेको छ।

१०७ सदस्यीय मधेस प्रदेशसभामा हाल १०५ सांसद रहेका छन्। यसमध्ये एमालेका एक निलम्बितसहित २५, कांग्रेसका २२, जसपाका १९, जनमतका १३, माओवादीका ९, लोसपाका एक निलम्बितसहित ९, एकीकृत समाजवादीका ७ र राप्रपा, नागरिक उन्मुक्ति तथा संघीय समाजवादी पार्टीका १–१ सांसद छन्।

सोनलको पक्षमा पाँच दलका ५६ सांसदको समर्थन रहेको बताइएको छ। बहुमतका लागि आवश्यक ५३ मतभन्दा तीन मत बढी भएकाले उनलाई सरकार गठनको सम्भावना बलियो देखिएको छ।

राजनीतिक विश्लेषकहरूका अनुसार यो प्रयास मधेस प्रदेशमा स्थायित्वभन्दा बढी शक्ति सन्तुलनको प्रतिस्पर्धा हो। सोनलको दाबी सफल भए लोसपाको राजनीतिक अस्तित्व पुनः स्थापित हुने सम्भावना छ। तर, गठबन्धनभित्रका दलहरूबीचको असहमति र स्वार्थको द्वन्द्वले सरकार अस्थिर हुन सक्ने चिन्ता पनि व्यक्त गरिएको छ।

सोनलको दाबीसँगै मधेस प्रदेशको राजनीति फेरि एकपटक तातिएको छ। कांग्रेस र एमाले विपक्षमा बस्ने तयारीमा छन् भने नयाँ गठबन्धनले सत्ता कब्जा गर्ने अन्तिम चरणमा पुगेको संकेत दिएको छ।