किष्ट अस्पतालमा गर्भवतीको मृत्यु प्रकरणपछि तनाव, प्रहरीद्वारा अस्पताल घेराबन्दी

काठमाडौँ, कात्तिक १० साेमवार, किष्ट अस्पतालमा आज बिहानैदेखि सुरक्षाकर्मीहरूको बाक्लो उपस्थिति देखिएको छ। अस्पतालको लापरबाहीका कारण एक गर्भवती महिलाको मृत्यु भएको भन्दै मृतकका आफन्त र परिवारजन आक्रोशित बनेपछि प्रहरीलाई सतर्क बनाइएको हो।

कात्तिक ७ गते उपचारका क्रममा ज्यान गुमाएकी ती महिलाको मृत्युबारे आफन्तले अस्पताललाई दोषी ठहर गर्दै न्यायको माग गरेका छन्। उनीहरूको आरोप छ  अस्पताल प्रशासनले घटनापछि न त छानबिन अघि बढायो, न त वार्ताको पहल नै गर्‍यो।

हिजो आक्रोशित भीडले अस्पताल परिसरमा सामान्य तोडफोड गरेपछि स्थिति नियन्त्रणमा लिन प्रहरीले बल प्रयोग नगरी अस्पताल वरिपरि घेराबन्दी गरेको छ। अहिले अस्पताल बाहिर ठूलो सङ्ख्यामा आफन्त र सर्वसाधारण भेला छन् भने प्रशासनले शान्त वातावरण कायम गर्न आग्रह गरेको छ।

स्थानीयले घटनाको छानबिन गरी दोषी चिकित्सक वा कर्मचारीमाथि कानुनी कारबाही गर्न माग गरेका छन्।