तराई जोड्ने द्रुतमार्गको सुरुङमा ऐतिहासिक सफलता : महादेवटारका दुवै सुरुङ छिचोलिए
२०८३ मंसिर ३, बुधबार १२:४८
काठमाडौं मसिर २ बुधबार विराटपाटी, नेपालको पूर्वाधार विकासमा महत्त्वपूर्ण उपलब्धि थपिएको छ। तराई–मधेश द्रुतमार्गअन्तर्गत मकवानपुरको महादेवटारमा निर्माणाधीन सबैभन्दा लामो सुरुङको दायाँ भाग पनि छिचोलिएको छ। बुधबार राष्ट्रपति रामचन्द्र पौडेलले ३.४४५ किलोमिटर लामो सुरुङको ‘ब्रेक थ्रु’ गरेसँगै यस खण्डका दुवै सुरुङ छिचोलिएका छन्।
यसअघि गत भदौमा ३.४८६ किलोमिटर लामो बायाँ सुरुङको ब्रेक थ्रु गरिएको थियो। दुवै सुरुङ छिचोलिनुलाई राष्ट्रिय गौरवको आयोजना फास्ट ट्र्याक निर्माणमा उल्लेखनीय प्रगतिका रूपमा हेरिएको छ।
ब्रेक थ्रु समारोहलाई सम्बोधन गर्दै राष्ट्रपति पौडेलले नेपाली सेनाले राष्ट्रिय सुरक्षाको जिम्मेवारीसँगै विकास निर्माणमा पनि महत्त्वपूर्ण भूमिका निर्वाह गर्दै आएको बताए। जटिल भौगोलिक अवस्था र चुनौतीपूर्ण भू–बनोटका बाबजुद सेनाले देखाएको व्यावसायिक दक्षता, कार्यकुशलता र समर्पण प्रशंसनीय रहेको उनको भनाइ थियो।
करिब ७१ किलोमिटर लामो काठमाडौँ–तराई/मधेश द्रुतमार्ग देशको यातायात पूर्वाधारमा नयाँ आयाम थप्ने आयोजना हो। निर्माण सम्पन्न भएपछि राजधानी काठमाडौँ र तराई–मधेशबीचको दूरी र यात्रा समय उल्लेखनीय रूपमा घट्ने अपेक्षा गरिएको छ।
राष्ट्रपति पौडेलका अनुसार द्रुतमार्ग सञ्चालनमा आएपछि यात्रु तथा ढुवानी सेवामा समयको बचत हुनुका साथै इन्धन खपत, सवारीसाधनको सञ्चालन र मर्मतसम्भार खर्चसमेत घट्नेछ। यसले राष्ट्रिय अर्थतन्त्र, व्यापार, पर्यटन र समग्र सामाजिक–आर्थिक रूपान्तरणमा सकारात्मक प्रभाव पार्ने विश्वास उनले व्यक्त गरे।
तर, सुरुङ छिचोलिनु मात्रै आयोजना सम्पन्न हुनु होइन। अब सुरुङको आन्तरिक संरचना, सडक कालोपत्रे, पुल, सुरक्षा प्रणाली तथा अन्य प्राविधिक काम समयमै सम्पन्न गर्नु उत्तिकै महत्त्वपूर्ण छ।
फास्ट ट्र्याकको सफल सञ्चालनले काठमाडौँ र तराईबीचको आवागमन सहज बनाउने मात्र होइन, मुलुकको आर्थिक गतिविधि, क्षेत्रीय सम्पर्क र विकासको सम्भावनालाई समेत फराकिलो बनाउनेछ। त्यसैले अबको मुख्य चुनौती निर्धारित समय, लागत र गुणस्तर कायम गर्दै आयोजना सम्पन्न गर्नु हो।
राष्ट्रिय गौरवको आयोजनामा थपिएको यो उपलब्धिले विकासप्रतिको आशा बढाएको छ। अब नागरिकले प्रतीक्षा गरेको परिणाम भनेको सुरुङ छिचोलिएको समाचार मात्र होइन, सुरक्षित र सुविधाजनक द्रुतमार्गमा यात्रा गर्न पाउने दिन हो।




