८७ प्रतिशत धान रोपाइँ, गत वर्षको तुलनामा सात प्रतिशत कम
२०८० श्रावण ३०, मंगलवार ०९:५३
यस वर्ष मुलुकमा ८७ प्रतिशत धान रोपाइँ भएको छ ।
कृषि तथा पशुपन्छी विकास मन्त्रालयले साउन ११ गतेसम्मको तथ्यांकमा ८७ प्रतिशत जमिनमा धान रोपाइँ भएको देखाएको छ, जुन अघिल्लो वर्षको सोही अवधिको तुलनामा सात प्रतिशतले कम हो ।
मन्त्रालयका प्रवक्ता सबनम शिवाकोटीले साउन २१ गतेसम्मको तथ्यांकअनुसार १४ लाख हेक्टर क्षेत्रफलमा ८७ प्रतिशत धान रोपिएको बताए ।
यस वर्ष मधेस प्रदेश, वाग्मती प्रदेश र गण्डकी प्रदेशमा मनसुन ढिलो भएकाले धान रोपाइँ खुम्चिएको छ ।
धान प्रत्यारोपण यसै महिना (साउन) सम्म चल्ने छ । तर, मन्त्रालयले यसै महिनाको अन्त्यसम्म ९२ देखि ९५ प्रतिशत धान रोप्ने अनुमान गरेको छ ।
कोशी प्रदेशमा ९४ प्रतिशत जमिनमा धान रोपिएको छ भने मधेशमा ६८ प्रतिशत मात्रै छ । गण्डकी प्रदेशले ९३ प्रतिशत धान रोपेको छ भने कर्णालीले ९८ प्रतिशत, लुम्बिनी ९३ प्रतिशत र सुदूरपश्चिममा ९९ प्रतिशत धान रोपेको छ ।




